ბავშვები არდადეგებზე ისვენებენ, როგორც საქართველოში, ასევე მის ფარგლებს გარეთ. მიტროპოლიტი დიმიტრის თანხლებით აღსაზრდელები იყვნენ იერუსალიმში, მოილოცეს ყველა წმინდა ადგილი და მეუფის მიერ დაწვრილებით მოისმინეს ინფორმაცია მათ შესახებ. იმოგზაურეს საბერძნეთში – მოილოცეს ათონის წმ. მთა, დაათვალიერეს მეტეორა – სამონასტრო კომპლექსი, ქალაქ პატრაში – მოილოცეს წმ. ანდრია პირველწოდებულის სახელობის ტაძარი, სადაც დაბრძანებულია მისი წმ.ნაწილები. დაათვალიერეს ათენის ღირშესანიშნაობები. მოილოცეს წმ. დიმიტრი თესალონიეკელის ტაძარი. იმოგზაურეს გემით იტალიაში ქალაქ ბარში, რათა თაყვანი ეცათ წმ. ნიკოლოზის საფლავისათვის.

იყვნენ კაბადოკიაში – წმ. ნინოსა და წმ. გიორგის სამშობლოში, მოინახულეს ტაო–კლარჯეთის ტაძრები – ოშკი, იშხანი, პარხალი, ოთხთა, ხახული და სხვა.
ასევე იმოგზაურეს ეგვიპტეში, დაისვენეს შარმ ელ შეიხში, მოილოცეს სინას მთა, წმ. ეკატერინეს მონასტერი, დაათვალიერეს კაიროს მუზეუმი, მოინახულეს პირამიდები, სფინქსის ქანდაკება. ეგვიპტიდან გადავიდნენ იერუსალიმში და მოილოცეს წმ. ადგილები.
ისვენებდნენ ანტალიაში ზღვაზე, იქ ყოფნის პერიოდში გახლდნენ ქალაქ მირონლუკიაში დღევანდელ ქალაქი მირო, სადაც მოღვაწეობდა წმ. ნიკოლოზი.
საზაფხულო არდადეგების პერიოდში მოინახულეს საქართველოს სხვადასხვა ტაძრები და სამონასტრო კომპლექსები ესენია: ჯიხეთის, გელათის, მოწამეთას, უბისას, სამთავროს, შიო მღვიმეს, ჯვრის, სვეტიცხოველის სამების, დავით–გარეჯას, ვარძიის, წმ. ოანე ნათლისმცემლის, ზვარეს და მრავალი სხვა ისტორიული ძეგლები.
გიმნაზია–პანსიონს პერიოდულად სტუმრობს სრულიად საქართველოს კათალიკოს–პატრიარქი, მცხეთა–თბილისის მთავარეპისკოპოსი, ბიჭვინთისა და ცხუმ–აფხაზეთის მიტროპოლიტი, უწმინდესი და უნეტარესი ილია II , თანმხლებ პირებთან ერთად.
სხვადასხვა დროს იმყოფებოდა მღვდელმთავრები და სასულიერო პირები, საზოგადო მოღვაწეები, მათ შორის იყო – მურმან ჯინორია, ოტია იოსელიანი, გურამ დოჩანაშვილი, რამაზ ჩხიკვაძე, სუხიშვილების მოცეკვავეები, ნინო ანანიაშვილი, ქეთი დოლიძე, ნუგზარ კვაშალი, ოთარ ტატიშვილი, ოთარ კობერიძე, ნინელი ჭანკვეტაძე, გუჯა ბურდული, პაატა ბურჭულაძე, ქეთი მელუა, ვახტანგ ტატიშვილი, ზაზა ფაჩულია და სხვები.
2012–2013 სასწავლო წელს გიმნაზიას ჰყავდა პირველი გამოსაშვები კლასი. თითოეულმა მათგანი ჩაირიცხა სხვადასხვა უმაღლეს სასწავლებელში. მათ შორის: ერთმა სწავლა განაგრძო იტალიაში ქ.მილანში ნაბას აკადემიაში – ინტერიერის დიზაინის ფაკულტეტზე, ორი ჩაირიცხა საქართველოს ტექნიკურ უნივერსიტეტში არქიტექტურის ფაკულტეტზე, ერთი კი ბათუმის საზღვაო აკადემიაში.
გიმნაზია–პანსიონში ჩარიცხული ბავშვები უზრუნველყოფილი არიან ოთხჯერადი კვებით, სამედიცინო მომსახურებითა და სხვა საჭიროებებით. შექმნილი გარემო და ყველაფერი, რაც ბავშვებს ხმარდება არის მაღალი ხარისხის და გემოვნებით შერჩეული, რათა აღზრდის პროცესში ჩამოუყალიბდეთ დახვეწილი გემოვნება და ესთეთიკური ხედვა. ამასვე ემსახურება შენობის თანამედროვე, მრავალფეროვანი იტერიერი. შენობა მოიცავს სრულ 4 სართულს და მანსარდს.
სასწავლო პროცესისათვის საჭირო ყველა სახელმძღვანელოს და იმ ნივთის შეძენა, რომელსაც ბავშვები მოიხმარენ, ხდება დაწესებულების მიერ. ასევე მარაგდება ბიბლიოთეკა ახალი ლიტერატურით.